Skyndihjálp fyrir 60 ára og eldri

4 klst. námskeið í skyndihjálp, kennt með þarfir eldri borgara í huga. 

Við verðum aldrei of gömul til að bjarga lífi - við kennum þér hvernig bregðast skal við í neyðartilfelli.
Slys og bráð veikindi gera ekki boð á undan sér. Hvort sem þú vilt vera tilbúin/n til að hjálpa maka þínum, barnabarni, vini, vinkonu eða ókunnugri manneskju í búðinni, þá veitum við þér þekkinguna og sjálfsöryggið til að bregðast rétt við þegar neyðin kallar.

Efnistök námskeiðsins:

Við munum fara yfir allt það helsta sem viðkemur skyndihjálp og endurlífgun, til dæmis:

• Að kalla á hjálp - hvenær og hvernig á að hafa samband við Neyðarlínuna.

• Helstu einkenni bráðra, lífshótandi veikinda eins og hjartaáfalls og heilablóðfalls og fyrstu viðbrögð í kjölfarið.

• Hvað skal gera ef einstaklingur er ekki með lífsmarki (endurlífgun).

• Hvernig þú getur notað hjartastuðtæki sem til staðar eru á flestum almenningsstöðum til að koma hjartanu aftur í gang eftir hjartastopp.

• Skyndihjálp fyrir slys, svo sem blæðandi sár, brunasár, beinbrot og byltur.

• Fyrstu viðbrögð í bráðum veikindum á borð við sykurfall, flog og bráðaofnæmi.

Hvað gerir þetta námskeið öðruvísi?

Hentar þeim sem glíma við hreyfiskerðingu eða aðra færniskerðingu
Auk þess að kenna hefðbundna skyndihjálp munum við einnig fara yfir hvernig hægt er að aðlaga handtökin eftir færni og styrk hvers og eins. Þú þarft ekki að fara á gólfið til að hnoða ef þú treystir þér ekki til - við förum yfir hvað þú getur gert í staðinn.

Kennt á þægilegum hraða
Við stillum kennsluhraðanum í hóf og gerum ráð fyrir tíma til að spyrja spurninga og taka pásur. Við munum ekki ýta á eftir þér og við erum alltaf til í að útskýra aftur ef eitthvað er óljóst.

Minni hópur - meiri stuðningur
Á hverju námskeiði eru tveir kennarar og einungis 10 nemendur - því við viljum hafa nægan tíma fyrir hvert og eitt ykkar.

Smáatriðin:

• Tímalengd: 4 klst. (með pásum)
• Stærð hóps: Hámark 10 þátttakendur.
• Staðsetning: Bæjarlind 14-16, 201 Kópavogi. 2. hæð, lyfta á staðnum.
• Kennarar: Guðrún Ingibjörg Þorgeirsdóttir, læknir, og Haukur Smári Hlynsson, hjúkrunarfræðingur. Guðrún og Haukur hafa bæði kennsluréttindi í skyndihjálp.
• Inniheldur: Skírteini frá Bráðaskólanum, skráning í gagnagrunn Rauða krossins sem gildir í 2 ár. Kaffi, vatn og konfekt meðan á námskeiði stendur.

Ertu tilbúin/n til að læra að bjarga lífi?

Þú getur skráð þig með því að setja námskeiðið "í körfu" hér á þessari síðu, eða með því að senda okkur kennitöluna þína í tölvupósti á netfangið bradaskolinn@bradaskolinn.is, við sendum þér þá kröfu í heimabanka.

Taktu þitt pláss frá strax - við hlökkum til að sjá þig!